Çap olunan sənəd: http://www.adpu.edu.az/gen/html/azl/universitet/xeber/2017/xeber-390.htm
ADPU-da “Azərbaycan-Türkiyə münasibətləri” II Beynəlxalq elmi konfransı keçiriləcək
ADPU-da “Azərbaycan-Türkiyə münasibətləri” II Beynəlxalq elmi konfransı keçiriləcək
İctimaiyyətlə əlaqələr şöbəsi
Oktyabrın 12-14-də Azərbaycan Dövlət Pedaqoji Universitetinin (ADPU), Azərbaycan Turizm və Menecment Universitetinin (ATMU) və Türkiyə Respublikasının Kastamonu Universitetinin birgə təşkilatçılığı ilə ADPU-da “Azərbaycan-Türkiyə münasibətləri” II Beynəlxalq elmi konfransı keçiriləcək.

 

Beynəlxalq konfransın elmi istiqamətləri Azərbaycan Türkiyə tarixi əlaqələrini, siyasi və iqtisadi münasibətləri, sosial-mədəni və ədəbi əlaqələri, elm və təhsil, turizm və ekologiya sahələrini əhatə edəcək. Məlumat üçün bildirək ki, konfransın keçirilməsi üçün tərkibinə azərbaycanlı və türkiyəli alim-mütəxəssislərin daxil edildiyi Təşkilat Komitəsi yaradılıb, konfransın koordinatorları, katibliyi və akademik heyəti müəyyən edilib. Beynəlxalq elmi konfransda Azərbaycan Milli Elmlər Akademiyasının (AMEA) rəhbərliyi, AMEA-nın müvafiq elmi-tədqiqat institutlarının, ali təhsil müəssisələrinin tanınmış və nüfuzlu pedaqoq-alimləri iştirak edəcəklər. Konfransda həmçinin Təhsil Nazirliyinin, Türkiyənin Azərbaycandakı səfirliyinin məsul şəxsləri, Türkiyə Əməkdaşlıq və İnkişaf İdarəsinin (TİKA) nümayəndələri iştirak edəcəklər. Hesab edirik ki, konfrans hər iki dövlətin elm və təhsil sisteminin inteqrasiyası sahəsində mühüm addım olacaq

Qeyd edək ki, konfransın proqramına əsasən iştirakçıların  əvvəlcə Fəxri Xiyabanda xalqımızın ümummilli lideri Heydər Əliyevin məzarını, görkəmli oftalmoloq alim, akademik Zərifə Əliyevanın məzarını, eləcə də Şəhidlər Xiyabanında Azərbaycanın ərazi bütövlüyü və dövlət müstəqilliyi üğrunda şəhid olmuş soydaşlarımızın məzarlarını və Türk əsgəri abidəsini ziyarət edərək “Əbədi məşəl” kompleksi, həmçinin Türk əsgəri abidəsinin önünə gül dəstələri qoymaları nəzərdə tutulur. Konfransın ADPU-nun Böyük Akt zalında keçiriləcək plenar iclasında  hər iki ölkənin dövlət himnləri səsləndiriləcək, təbrik məktubları oxunacaq, çıxışlar dinləniləcək. Plenar iclasdan sonra konfrans öz işini bölmə iclaslarında davam etdirəcək. Konfransın 6 bölmədə keçiriləcək iclaslarında ümumilikdə 84 elmi məruzənin dinlənilib müzakirə olunması nəzərdə tutulur. 3 gün davam edəcək beynəlxalq elmi konfrans oktyabrın 14-də başa çatacaq.  Qeyd etmək lazımdır ki, bu, ADPU-nun son bir ayda keçirdiyi sayca ikinci beynəlxalq elmi konfransdır. Xatırladaq ki, sentyabrın 12-14-də AMEA-nın, ADPU-nun, Xəzər Universitetinin, Türkiyənin Səlcuq Universitetinin, Sütçü İmam Universitetinin və Türk Tarix Qurumunun birgə təşkilatçılığı ilə “INOCTE-2017” “Osmanlı tədqiqatlarında yeni tendensiyalar” beynəlxalq konqresi çərçivəsində “Şərqi və Qərbi Türk dünyasının ortaq tarixi dövrləri və münasibətləri” Beynəlxalq elmi konfransı  yüksək səviyyədə təşkil edilib.

 


TSW (TuSi Web) 5.4.68 (beta) | TusiSoft