Pedaqoji ixtisaslar üzrə əlavə təhsil (ixtisasartırma, kadrların yenidən hazırlanması, stajkeçmə və kadrların təkmilləşdirilməsi, təkrar ali təhsil) dayandırılıb və hazırda ADPU-da da bu istiqamətdə qəbul aparılmır.

ADPU-da semestr imtahanları, əsasən, yazılı formada keçirilir. Bəzi fakültələrdə fənnin spesifkliyi nəzərə alınmaqla şifahi imtahanlar da təşkil edilir.

Universitetə dövlət sifarişi əsasında qəbul olunan tələbələr I semestr ərzində təqaüd alırlar. II semestrdən etibarən təqaüd müsabiqə əsasında verilir. Müsabiqə əsasında təqaüd almaq üçün cari smestri kəsrsiz bitirmək və semestr imtahanlarının nəticələrinə əsasən ixtisas üzrə müəyyən edilmiş təqaüd yerlərindən birini tutmaq lazımdır. Bu zaman dövlət sifarişi və ya ödənişli əsaslarla təhsil almanın fərqi yoxdur.

Ödənişli əsaslarla universitetə qəbul olunan tələbələr ilk semestr ərzində təqaüd almırlar. Hər növbəti semestrin imtahan sessiyasını kəsrsiz bitirdikləri və müsabiqə əsasında mövcud təqaüd yerlərindən birini tutduqları halda təqaüd almaq şansı qazana bilərlər.

Bakalavriat səviyyəsi üzrə:

· Adi təqaüd – 100 AZN

· Həvəsləndirici (zərbəçi) təqaüd – 145 AZN

· Əlaçı təqaüdü – 175 AZN

Magistratura səviyyəsi üzrə:

· Adi təqaüd – 110 AZN

· Həvəsləndirici (zərbəçi) təqaüd – 160 AZN

· Əlaçı təqaüdü – 195 AZN

Doktorantura səviyyəsi üzrə:

· Elmlər doktoru hazırlığı üzrə – 400 AZN

· Fəlsəfə doktoru hazırlığı üzrə – 240 AZN

Əlaçı təqaüdü semestr imtahanlarında bütün fənlərdən A (91+) qiyməti almış və ixtisas üzrə təqaüd üçün ayrılmış yerlərdən birini tutmuş tələbələrə verilir. Həvəsləndirici təqaüd isə semestr imtahanlarında ən azı bir fəndən A (91+), digər bütün fənlərdən isə ən azı C (71+) qiyməti almış və ixtisas üzrə ayrılmış təqaüd yerlərindən birini tutmuş tələbələrə verilir.

Akademik borc (kəsr) aşağıdakı hallarda yaranır:

· Semestr ərzində fənn üzrə dərslərin 25 % və daha artığında iştirak etməyərək, limitə düşdükdə və imtahana buraxılmadıqda;

· Semestr imtahanında 17 baldan aşağı nəticə göstərdikdə;

· İmtahana giriş balı və imtahan balının cəmi 51 balı keçmədikdə;

· İmtahan qaydalarını pozaraq imtahandan kənarlaşdırıldıqda və imtahan nəticəsi ləğv edildikdə.

Semestr ərzində fənn üzrə dərslərin 25 % və daha artığında iştirak etməyən tələbə imtahana buraxılmır və fənn üzrə akademik borc (kəsr) yaranmış hesab edilir.

Fənn üzrə qiymətini dəyişmək istəyən tələbə yay semestrində fənni təkrar dinləyərək yenidən imtahanda iştirak edə və qiymətini dəyişə bilər.

Tələbə yaranmış borcunu (kəsr) aşağıdakı formalarda ödəyə bilər:

· Fənnin dəyərinin 25 %-ni ödəyib, fənni təkrar dinləmədən birbaşa imtahan verərək;

· Növbəti tədris ili və ya semestr ərzində alt qrupla fənni təkrar dinləyərək imtahan verməklə;

· Yay semestri ərzində fənni təkrar dinləyib imtahan verərək.

Tələbə yaranmış akademik borcunu ödəmək üçün fənnin dəyərinin 25 %-ni ödəyərək, fənni təkrar dinləmədən birbaşa imtahanda iştrak edə bilər. Bu imtahanlar semestr imtahanlarının ardınca təşkil edilir. Hər semestr üzrə tələbəyə ən çox 2 fəndən yaranmış borcu 25 % imtanları vasitəsilə ödəmə şansı yaradılır. Aşağıdakı hallarda akademik borcu olan tələbənin 25% imtahanlarında iştirakına icazə verilmir:

· Semestr ərzində fənn üzrə dərslərin 25 % və daha artığında iştirak etməyərək limitə düşdükdə

· Üzrsüz halda imtahana gəlmədikdə və bununla bağlı rəsmi arayış təqdim etmədikdə

· İmtahandan xaric edildiyi üçün imtahan nəticəsi ləğv edildikdə

Hər fənn üzrə tələbəyə yalnız bir dəfə bu şans verilir.

Yay semestri könüllülük prinsipi ilə ödənişli əsaslarla həyata keçirilir və aşağıdakı məqsədlərlə təşkil olunur:

· Akademik borcun (kəsr) ödənilməsi

· Fənn üzrə qiymətin yüksəldilməsi

· Seçmə fənlərin kreditlərinin qazanılması

Qeyd edək ki, tələbə yay semestrinə yazıldığı fənlər üzrə yay tətili dövründə dərslərdə iştirak edərək, imtahan verir.

Akademik borcu (kəsri) olan tələbə növbəti semestr ərzində təqaüd almaq şansını itirir. Borcun 25 % imtahanı və ya yay semestri vasitəsilə ödənilməsi təqaüd şansını bərpa etmir. Tələbə nöbəti semestri kəsrsiz başa vurduğu halda (akademik borcu ödənməmiş qalsa belə) yenidən təqaüd almaq şansını bərpa edir.

"Təhsil haqqında" Azərbaycan Respublikasının Qanununun 14.8.-ci maddəsinə əsasən sosial müdafiəyə xüsusi ehtiyacı olan aşağıdakı şəxslərin təhsil müəssisələrində ödənişli əsaslarla təhsil aldıqları müddətdə təhsil haqqı dövlət büdcəsinin vəsaiti hesabına ödənilir (hər təhsil səviyyəsi üzrə bir dəfə olmaqla):

· valideynlərini itirmiş və valideyn himayəsindən məhrum olmuş uşaqlar, habelə onların arasından olan şəxslər;

· şəhid ailəsinin üzvləri;

· alan Azərbaycan Respublikasının ərazi bütövlüyü uğrunda döyüş əməliyyatlarında iştirak etdiyinə görə “Müharibə veteranı” adı almış şəxslər;

· orqanizmin funksiyalarının 61-100 faiz pozulmasına görə, habelə 18 yaşınadək əlilliyi müəyyən edilmiş şəxslər

· Azərbaycan Respublikasının ərazi bütövlüyünün, müstəqilliyinin və Konstitusiya quruluşunun müdafiəsi ilə əlaqədar əlilliyi müəyyən edilmiş və Azərbaycan Respublikasının azadlığı, suverenliyi və ərazi bütövlüyü uğrunda həlak olan, hərbi əməliyyatla əlaqədar itkin düşən və məhkəmə tərəfindən ölmüş elan edilən vətəndaşların uşaqları; · “Qaçqınların və məcburi köçkünlərin (ölkə daxilində köçürülmüş şəxslərin) statusu haqqında” Azərbaycan Respublikasının Qanununa uyğun olaraq məcburi köçkün statusu olan Azərbaycan Respublikasının vətəndaşları;

· 20 yaşına çatmamış və orqanizmin funksiyalarının 81-100 faiz pozulmasına görə əlilliyi müəyyən edilmiş valideyni olan, aylıq gəliri yaşayış minimumundan aşağı olan şəxslər;

· köçürülmə günü ana bətnində olan uşaqlar da daxil olmaqla, uzaqlaşdırma və köçürmə zonalarından köçürülmüş uşaqların və ya 18 yaşınadək yeniyetmələrin, habelə 1986-cı il aprelin 26-dan sonra

doğulmuş və Çernobıl AES-də qəzanın nəticələrinin ləğv edilməsinin iştirakçısı olmuş, yaxud Çernobıl qəzası nəticəsində zərər çəkmiş və birbaşa radioaktiv şüalanmaya məruz qalmaq ehtimalı olmuş valideynlərin birindən olan uşaqlar.

İxtisas dəyişikliyi mərkəzləşdirilmiş qaydada “portal.edu.az” saytı vasitəsilə transfer formasında aparılır. Transfer qaydaları ilə aşağıdakı linkə keçid edərək tanış ola bilərsiniz: https://edu.gov.az/higher-education/telebe-kocurulmesi