2024/2025-ci tədris ili üçün ali təhsil müəssisələrinə qəbul imtahanlarının nəticələrinə əsasən ölkəmizi dünya müstəvisində uğurla təmsil etmiş 6 nəfər olimpiya və beynəlxalq idman yarışlarının mükafatçıları müsabiqədənkənar qaydada Pedaqoji Universitetin Fiziki tərbiyə və çağrışaqədərki hazırlıq müəllimliyi ixtisasına qəbul olunublar.
Gəlin, bu tələbələri yaxından tanıyaq:
Kərimova Leyla Kərim qızı - Sumqayıt şəhərində anadan olub. 2018-ci ildən pauerliftinq idman növü ilə məşğul olmağa başlayıb. 2 dəfə Respublika çempionu olub. 2021-ci ildə Gürcüstanda keçirilən dünya çempionatında qızıl medal qazanıb.
Leyla 2022-ci ildə Gürcüstanda keçirilən açıq Avropa çempionatında gənclər arasında 2 qızıl, böyüklər arasında 2 bürünc medal qazanmaqla yanaşı, gənclər arasında 74 kiloqram çəki dərəcəsində Avropa rekordu qırıb.
2023 cü ildə Birləşmiş Ərəb Əmirliklərində keçirilən dünya çempionatında gənclər arasında qızıl medal qazanıb. Eyni zamanda, öz çəki dərəcəsində Avropa rekordunu yeniləyib.
Zəkiyev Rəsul Vahid oğlu - Bakı Şəhərində anadan olub. O əlil arabasında rəqs və pauerliftinq idman növlərində ölkəmizi təmsil edir. Rəsul əlil arabasında rəqs üzrə ikiqat Azərbaycan çempionudur. 2019-cu ildə Rusiyada keçirilən dünya və qitə yarışlarında V yerə sahib olub. Həmin ildə Gürcüstanda keçirilən “IVERIA - DIAMOND – 2019” turnirində qızıl medal qazanıb.
Para-pauerliftinq sahəsində 3 qat Azərbaycan çempionu olan Rəsul bu idman növündə də ölkəmizi uğurla təmsil etməkdədir.
2023-cü ildə Dubayda keçirilən para-pauerlifinq üzrə dünya çempionatında gənclərin yarışında 80 kq çəki dərəcəsində çıxış edən Rəsul həm ən yaxşı çəkiyə görə, həm də ümumi qaldırdığı çəkiyə görə rəqiblərindən üstün olaraq ölkəmizə 2 qızıl medal qazandırıb.
Əlavə edək ki, istedadlı gənc olan Rəsul idmanla yanaşı inklüziv "Əsa" teatrında aktyor olaraq çoxsaylı tamaşalarda rol da alıb.
Dadaşova Zəhra İlqar qızı - Sumqayıt şəhərində anada olub. 2009-cu ildən para-pauerliftinq idman növü ilə məşğul olmağa başlayıb. Zəhra 2021-ci ildə Azərbaycan çempionatının qalibi olub. Həmin ildə Gürcüstanda keçirilmiş dünya çempionatında ölkəmizi təmsil edərək bürünc medala sahib olub.
Z.Dadaşova 2022-ci ildə Tbilisi şəhərində para-paurrliftinq üzrə 50 kq çəki dərəcəsində həm gənclər arasında Açıq Avropa çempionatının, həm də regional Avropa çempionatının qalibi olaraq 2 qızıl medal qazanmağı bacarıb.
2023-cü ildə Tblisidə para-paureliftinq idman növü üzrə 55 kq çəki dərəcəsində mübarizə aparan Zəhra gənclər arasında fərdi çəkidə qızıl, ümumi çəkidə isə gümüş medal qazanıb. Həmin ildə Birləşmiş Ərəb Əmirliklərində keçirilən dünya çempionatında gənclərin yarışında həm fərdi, həm də ümumi çəkiyə görə rəqiblərini üstələyərək 2 qızıl medal qazanıb.
İsmiyeva Xatirə Gülbala qızı - Əslən Şamaxı rayonunun Ərəbşalbaş kəndindəndir. Görmə məhdudiyyətinə baxmayaraq, uşaqlıq yaşlarından idmana böyük marağı olan Xatirə cüdo idman növü ilə məşğul olmağa başlamış, bu yolda məqsədlərinə çatmaq üçün böyük əzm və qətiyyətlə mübarizə aparmışdır. X.İsmiyeva 2019-cu ildə İtaliyanın Genuya şəhərində keçirilən Avropa çempionatında B1, + 70 kq kateqoriyası üzrə ölkəmizi təmsil edib.
O, 2022-ci ildə Bakıda keçirilən Avropa çempionatında (J1, + 70kq) 4-cü yer tutub. Həmin ildə Türkiyədə gözdən əlillər arasında paracüdo üzrə qran-pridə (“2022 IBSA Judo Grand Prix”, J1, + 70 kq) gümüş medala sahib olub. Eyni zamanda İtaliyada keçirilən Avropa çempionatında bürünc medal qazanıb.
2023-cü ildə Niderlandda keçirilən Avropa Paralimpiya Çempionatında (J1, + 70 kq) Xatirə ölkəmizə bürünc medal qazandırıb.
2024-cü ildə paracüdo üzrə Antalya Qran-Prisində J1 kateqoriyası üzrə yarışda bürünc medal görüşündə məğlub olan idmançımız Paris-2024: Yay Paralimpiya Oyunlarında Azərbaycanı təmsil etmək hüququ qazanıb J1 kateqoriyası üzrə + 70 çəki dərəcəsində bürünc medal uğrunda görüşdə məğlub olub.
Zeynalov Kamran Turab oğlu - 1992-ci ildə Sabirabad rayonunda anadan olub. Paralimpiyaçı güllə atıcısı olan Kamran bir çox ölkədaxili və beynəlxalq yarışlarda mübarizə aparmaqdadır.
2010-cu ildə Xorvatiya, 2014-cü ildə Almaniya, 2018-ci ildə Cənubi Koreya və 2019-cu ildə Avstraliyada keçirilən dünya çempionatlarında ölkəmizi təmsil edib.
Kamran 2021-ci ildə Serbiyada keçirilən Qran-Pri turnirində 10 metr məsafəyə atəşaçma yarışında rəqiblərini qabaqlayaraq qızıl medal qazanıb.
K.Zeynalov Tokio-2020: Yay Paralimpiya Oyunlarında həm kişilərin fərdi yarışında, həm də komanda yarışında ölkəmizi təmsil edib. 2023-cü ildə pnevmatik tapançadan 10 metr məsafəyə atəşaçma üzrə Azərbaycan çempionatının qızıl medalçısıdır. Həmin ildə Almaniyada keçirilən beynəlxalq turnirdə tapançadan 50 metr məsafəyə atəşaçma üzrə kişilərin fərdi yarışında gümüş medal, komanda yarışında isə bürünc medal əldə edib. Miks komanda növü üzrə 10 metr məsafəyə yarışda da gümüş medal qazanan komandamızın heyətində yer alıb. 2023-cü ildə Peruda keçirilən Dünya çempionatında iştirak edən K.Zeynalov dünya çempionu olmağı bacarıb. Kamran Paris-2024: Yay Paralimpiya Oyunlarında ölkəmizi təmsil edib.
Nəbiyev Əli Səhhət oğlu - 1982-ci ildə Sumqayıt şəhərində anadan olub. 2000-ci ildə hərbi xidmət zamanı döyüş tapşırığını yerinə yetirərkən minaya düşüb. Bundan sonra kamandan oxatma idman növü ilə məşğul olmağa başlayan Əli həm ölkədaxili, həm də beynəlxalq yarışlarda mübarizəyə qoşulub.
2014-cü ildə Nəbiyev Çex Respublikasında beynəlxalq turnirdə komanda yarışında bürünc medalın sahibi olub. 2016-cı ildə stend atıcılığının kompakt-sportinq növü üzrə Azərbaycan turnirində bürünc medal qazanıb.
Ə.Nəbiyev 2018-ci ildə Çex Respublikasında keçirilən Avropa çempionatında və 2019-cu ildə İtaliyada keçirilən Avropa kubokunda ölkəmizi təmsil edib. 2020-ci il Azərbaycan çempionatında ölkə çempionu adını qazanıb.
2022-ci ildə Türkiyədə keçirilən V İslam Həmrəliyi Oyunlarında komanda yarışında bürünc medal qazanıb. 2023-cü ildə keçirilən Avropa Paralimpiya Çempionatında kamandan oxatma idman növü üzrə yığmamızın heyətində yer alıb. Həmin ildə keçirilən Heydər Əliyevin xatirəsinə həsr olunuş beynəlxalq turnirin qalibi olub.
