Noyabrın 5-də Azərbaycan Dövlət Pedaqoji Universiteti Təhsil Könüllüləri Tələbə Birliyinin (ADPU TKTB) fəal tələbələri Universitetin 44 günlük Vətən müharibəsində şəhid olmuş tələbəsi, “Azərbaycan Bayrağı” ordenli Firdovsi Tahirovun ailəsini ziyarət ediblər. Görüş zamanı valideynləri Firdovsi haqqında xatirələrini tələbələrlə bölüşüb, keçdiyi döyüş yolu barədə söz açıblar.

Tələbələr şəhidlərin ruhuna dərin ehtiramlarını ifadə edib, onların uca xatirələrini daim yaşatmağın gənclərin qarşılarında böyük missiya olduğunu bildiriblər.

F.Tahirovun yaxınları ziyarət üçün tələbələrə təşəkkür edib və övladlarının xatirəsinin gənclər tərəfindən yaşadılmasından məmnunluqlarını bildiriblər.

Qeyd edək ki, 1997-cui ildə Lerik rayonunun Dico kəndində anadan olan Firdovsi Balaxan oğlu Tahirov 2015-2019-cu illərdə ADPU-nun Tarix müəllimliyi ixtisasında təhsil alıb. 2020-ci ilin 27 sentyabrında başlanan Vətən müharibəsinin ilk günündə Murovdağ istiqamətində gedən döyüşlərdə qəhrəmancasına şəhid olan F.Tahirov göstərdiyi qəhrəmanlığa görə ölümündən sonra “Azərbaycan Bayrağı” ordeni, “Vətən uğrunda”, “Cəsur döyüşçü” və “Kəlbəcərin azad olunmasına görə” medalı ilə təltif edilib.

Eyni zamanda ADPU TKTB fəalları Pedaqoji Universitetin şəhid məzunu Tural Dəmirçiyevin ailəsi və yaxınları ilə də görüşüblər. Tələbələr Turalın yaxınlarından onunla bağlı xatirələri dinləyib, döyüş yolu ilə tanış olublar.

Şəhidin ailəsinə ehtiramlarını ifadə edən tələbələr Turalın timsalında dövlətimizin ərazi bütövlüyü və suverenliyimizin bərpası uğrunda canlarından keçən bütün şəhidlərimizin xatirəsinin xalqımızın qəlbində əbədi yaşayacağını bildiriblər.

Qeyd edək ki, Dəmirçiyev Tural Rəfail oğlu 1999-cu ildə Sabunçu rayonunun Ramana qəsəbəsində anadan olub. O, 2010-2014-cü illərdə ADPU-nun Menecment ixtisasında təhsil alıb. 2020-ci ilin oktyabrın 5-də Füzuli rayonu istiqamətində əks-hücum əməliyyatında qəhrəmanlıqla şəhid olan Tural ölümündən sonra “Vətən uğrunda” və “Füzulinin azad olunmasına görə” medalları ilə təltif edilib.