Azərbaycan Dövlət Pedaqoji Universitetinin (ADPU) Şamaxı filialında 31 Dekabr - Dünya Azərbaycanlılarının Həmrəyliyi Gününə həsr olunmuş “Həmrəylik işığında Azərbaycan” adlı tədbir keçirilib. 

Tədbir 31 Dekabr - Dünya Azərbaycanlılarının Həmrəyliyi Gününə həsr olunmuş videoçarxın nümayişi ilə başlayıb.

ADPU-nun Şamaxı filialının direktoru dosent Tünzalə Yusifova giriş sözü ilə çıxış edərək qeyd edib ki, hər il dekabr ayının son gününün Dünya Azərbaycanlılarının Həmrəyliyi Günü kimi qeyd olunması müxtəlif səbəblərdən dünyanın fərqli ölkələrində yaşayan soydaşlarımızın tarixi vətən - müstəqil Azərbaycanla əlaqələrinin möhkəmlənməsinə, həmçinin onların bir-birləri ilə sıx ünsiyyət qurmalarına, milli-mənəvi dəyərlərimizin, ənənələrimizin qorunub saxlanılmasına xidmət edir. T.Yusifova vurğulayıb ki, bu gün, ilk növbədə, azərbaycançılıq ideologiyasına söykənir ki, son illərdə bu ideologiya müstəqil Azərbaycanın çiçəklənməsinə və dünya azərbaycanlılarının özünüdərkinə təkan verən güclü bir amilə çevrilmişdir. Direktor tariximizə qızıl hərflərlə yazılan Vətən  müharibəsində  qazandığımız Zəfərin həmrəyliyimizin, xalq-iqtidar birliyinin - bir yumruq ətrafında birləşməyimizin bariz nümunəsi olduğunu vurğulayıb.

Ardınca Sosial və xüsusi fənlər kafedrasının baş müəllimi f.ü.f.d. Şasəddin Mikayılov “Birlik və həmrəylik Azərbaycan xalqının həyat tərzidir” mövzusunda ətraflı məruzə ilə çıxış edib. Məruzədə Ulu Öndər Heydər Əliyevin əsasını qoyduğu bu tarixi bayramın məqsəd və nəticələri geniş şəkildə işıqlandırılıb.

Tədbirin davamında Riyaziyyat və kompüter elmləri kafedrasının baş müəllimi Çingiz Dadaşov “Həmrəyliyin Azərbaycan modeli”, Dil-ədəbiyyat və onların tədrisi texnologiyaları kafedrasının baş müəllimi Vəsilə Razımi “Ləzgilər: adətlər və dəyərlər”, Pedaqogika və psixologiya kafedrasının müəllimi Yeganə Məlikova “Gənclik yaşının psixoloji xüsusiyyətləri və onlarda milli həmrəyliyin təşəkkülü” mövzularında çıxış ediblər.