Previous Next

ADPU-da tələbə və şagirdlər üçün master-klass: “Gələcəyin müəllimi”

 

Azərbaycan Dövlət Pedaqoji Universitetində (ADPU) 5 Oktyabr - Beynəlxalq Müəllimlər Gününə həsr olunmuş “Gələcəyin müəllimi” mövzusunda interaktiv tədbir keçirilib. Tədbir iştirakçıları əvvəlcə ümummilli lider Heydər Əliyevin ali təhsil ocağının foyesindəki abidəsini ziyarət ediblər.
Universitetin yüksək göstəricili yuxarı kurs tələbələri və ADPU-nun baza məktəbi olan 7 nömrəli tam orta məktəbin X-XI sinif şagirdlərinin iştirakı ilə keçirilən tədbirdə açılış sözü ilə çıxış edən rektor professor Cəfər Cəfərov qonaqları və tədbir iştirakçılarını salamlayaraq əlamətdar bayram münasibəti ilə təbrik edib. Rektor vurğulayıb ki, gələcəyin müəllimi olmaq qabaqlayıcı və qeyri-standart düşünmə ilə başlayır.
Prof. C.Cəfərov deyib: “Yaşadığımız əsrdə elm, təhsil və texnologiyalar misli görünməmiş sürətlə inkişaf edir. Belə şəraitdə Pedaqoji Universitet, ümumilikdə ölkə olaraq yüksəkixtisaslı, müasir dünyagörüşlü, milli dəyərlərə sadiq müəllim kadrlarının hazırlanmasını təmin etmək əsas məqsədimizdir. Bu məqsədə çatmaq üçün 3 strateji inkişaf xəttini diqqətinizə çatdırmaq istərdim: təhsilalanlara Vətən, dövlət və tarix sevgisinin aşılanması; təhsilalanların öz ölkəsinin tərəqqisinə xidmət etməsi; təhsilalanlara rəqəmsal biliklər və xarici dil bacarıqlarının verilməsi.
Təsadüfi deyil ki, bütün bu keyfiyyətlər Avropa Şurası tərəfindən, habelə 2020-ci ildə qəbul edilən “Azərbaycan Respublikasında ümumi təhsilin dövlət standartları”nda XXI əsr səriştə və bacarıqları kimi qeyd olunur.”
Tələbə və şagirdlər üçün master-klass formatında təşkil olunan tədbirdə Azərbaycan Respublikası Təhsil İnstitutunun (ARTİ) İnsan Resursları Mərkəzinin direktoru Nurlan İsmayılbəyli “Müəllimlərin işə qəbulu”, ADPU məzunu, 214 nömrəli tam orta məktəbin direktoru Fəttah Fəttayev “Peşəkar həyatın başlanğıcı”, ADPU-nun müəllimi, psixoloq Gülər Məmmədova “Fərqindəlik və motivasiya” və ADPU-nun məzunu, ictimai fəal, İsmayıllı rayonunda fəaliyyət göstərən gənc müəllim Ülvi Şamilov isə “Sosial-ictimai aktivliyin müəllimlikdə rolu” mövzularında təqdimatla çıxış etmiş, öz peşəkar təcrübələrini bölüşmüşlər.
Mövzular üzrə maraqlı diskussiya ilə davam edən tədbirdə tələbə və şagirdlərin fikirləri dinlənilmiş, sualları cavablandırılmışdır.

Ünvan məlumatları

Üzeyir Hacıbəyli, 68, Bakı, Səbail, AZ1000

Şəbəkəmiz

Kollec və filiallarımız ilə tanış olun

Xəbərlərə abunə olun

E-poçt ünvanınızı daxil etməklə məlumat əldə edin