Previous Next

Quba filialının müəllim və tələbələri şəhid Rəvan Əliyevin ailəsini ziyarət edib

Azərbaycan Dövlət Pedaqoji Universitetinin (ADPU) Quba filialının müəllim və tələbə kollektivi şəhid Rəvan Yusif oglu Əliyevin ailəsini ziyarət ediblər. Ziyarət zamanı filialın direktoru dosent Yusif Alıyevin və filial kollektivinin adından Şəhidin anası Mehriban Əliyevaya qəhrəman anası kimi təşəkkür və minnətdarlıq məktubu təqdim edilib.
Görüş zamanı THİK sədri, Tarix, pedaqogika və sosial elmlər kafedrasının baş müəllimi Aygün Şıxbabayeva, Ədəbiyyat və dillər kafedrasının baş müəllimi Eyvaz Şeydayev, TGT sədri Nicat Piriyev və Riyaziyyat müəllimliyi ixtisasının II tədris ili tələbələri şəhidin ev muzeyi ilə yaxından tanış olub, adına ucaldılan bulaq kompleksini ziyarət ediblər.
Qeyd edək ki, Rəvan Əliyev 27 may 2001-ci ildə Sumqayıt şəhərində anadan olub. Quba şəhərində yaşayıb. 2007-ci ildə Quba şəhər 3 saylı orta məktəbdə təhsil almağa başlayıb. İkinci sinifdə oxuyanda Quba musiqi məktəbinə qəbul olub və orada tar sinfini bitirib. Musiqi ilə bərabər futbolla da məşğul olub. Oradakı fəallığına görə Fəxri fərmana layiq görülüb. 2016-cı ildə Bakı İdarəetmə və Texnologiya Kollecinə qəbul olunub.
5 iyul 2019-cu ildə hərbi xidmətə başlayıb. Yevlax şəhərində Dövlət Sərhəd Xidməti sıralarında xidmət edib. Vətən müharibəsi başlayanda Rəvan qulluq etdiyi hərbi hissədən bir zabit və altı əsgər ilə birlikdə müharibəyə könüllü olaraq qoşulub.
Zəngilan uğrunda gedən döyüşlər zamanı, 23 oktyabrda yeddi könüllü əsgərin hamısı şəhid olub. Onlar Vətən müharibəsində Sərhəd Qoşunlarının ilk şəhidləri olublar. 29 oktyabr 2020-ci ildə Quba Şəhidlər Xiyabanında dəfn olunub.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Rəvan Əliyev ölümündən sonra "Vətən uğrunda", "İgidliyə görə" və "Zəngilanın azad olunmasına görə" medalı ilə təltif edilib.

Ünvan məlumatları

Üzeyir Hacıbəyli, 68, Bakı,
Səbail, AZ1000

 

Şəbəkəmiz

Kollec və filiallarımız ilə tanış olun

Xəbərlərə abunə olun

E-poçt ünvanınızı daxil etməklə məlumat əldə edin