Azərbaycan Respublikası Elm və Təhsil Nazirliyi (AR ETN) və Azərbaycan Dövlət Pedaqoji Universitetinin Strateji İnkişaf Mərkəzinin (ADPU SİM) birgə təşkilatçılığı ilə PISA 2025 Beynəlxalq Şagird Qiymətləndirmə Tədqiqatının sınaq mərhələsi üzrə infosessiyalar təşkil olunub. 
Beynəlxalq Şagird Qiymətləndirmə Proqramı olan PISA (Programme for International Student Assessment) ümumi təhsil müəssisələri üzrə 15 yaşlı şagirdlərin oxu, riyaziyyat, təbiət elmləri və yaradıcı düşünmə üzrə bilik və bacarıqlarını qiymətləndirmək, eyni zamanda şagirdlərin bu bacarıqları real həyatda tətbiq etmək qabiliyyətlərini müəyyənləşdirmək məqsədilə təşkil olunur. 
İqtisadi Əməkdaşlıq və İnkişaf Təşkilatı (OECD) tərəfindən 3 ildən bir həyata keçirilən bu beynəlxalq qiymətləndirmə tədqiqatında XXI əsrdə öyrənənlərin mürəkkəb problemləri həll etməyə, tənqidi düşünməyə və effektiv ünsiyyət qurmağa necə hazır olduqlarının ölçülərək dəyərləndirilməsi əsas hədəf olaraq ortaya qoyulur.
ADPU SİM tərəfindən 6-9 may 2024-cü il tarixləri aralığında onlayn formatda  həyata keçirilən infosessiyalarda paytaxt və digər regionlardan riyaziyyat, Azərbaycan dili və ədəbiyyatı, biologiya, fizika, kimya, coğrafiya fənləri üzrə tədqiqata cəlb olunan məktəblərdə tədris aparan 800 nəfərə yaxın müəllim, həmçinin həmin məktəblərin direktor müavinləri iştirak ediblər. İnfosessiyalar ərzində PISA 2025-də öyrənənlərin                                                                                                                                                                          məktəbdə və məktəbdən kənarda öyrəndiklərini sosial həyata qatılmaq üçün nə dərəcədə istifadə edə bildiyinin qiymətləndiriləcəyi, onların öyrənmə prosesinə yanaşmaları, münasibətləri və motivasiyaları haqqında məlumatların toplanacağı qeyd olunub. İnfosessiyanın sonunda fənn müəllimlərinə PISA beynəlxalq tədqiqatının öncəki dövrlərində istifadə olunmuş suallar, həmçinin 2025-ci il üçün nəzərdə tutulan nümunə suallar təqdim olunub, müzakirələr əsasında nümunə suallar üzrə iş aparılıb.
Qeyd edək ki, cari ilin may ayında tədqiqatın sınaq mərhələsinin yekunlaşdırılması, 2025-ci ildə isə əsas mərhələnin təşkili nəzərdə tutulur.  
PISA beynəlxalq tədqiqatı ölkələrin təhsil sistemlərinə öyrənənlərin gələcək həyata hazırlığı, qlobal maarifləndirmə, ekoloji savadlılıq, ətraf mühitin qorunması, media savadlılığı, bütün bunların real həyat şəraitində tətbiqi və s.  mövzular üzrə  beynəlxalq müqayisələrə imkan verən data əsaslı məlumatlar verir.