Mayın 25-də Azərbaycan Dövlət Pedaqoji Universitetinin (ADPU) Ağcabədi filialında Ümummilli Lider Heydər Əliyevin anadan olmasının 100 illik yubileyinə həsr olunmuş “Heydər Əliyev və Azərbaycan gəncliyi” mövzusunda Tələbə Elmi Cəmiyyətinin XVII konfransı keçirildi.
Konfransın plenar iclasını giriş sözü ilə açan filialın direktoru dosent Mobil Məcidov konfrans iştirakçılarını salamladıqdan sonra Ölkə Prezidenti cənab İlham Əliyevin Azərbaycan Respublikasında 2023-cü ili “Heydər Əliyev İli” elan etməsi ilə əlaqədar Respublikanın ictimai həyatında, idarə və müəssisələrdə, ali təhsil ocaqlarında silsilə tədbirlər keçirilməsindən, xüsusilə də ADPU-nun Ağcabədi filialında bu istiqamətdə həyata keçirilən tədbirlərin davamı olaraq “Heydər Əliyev və Azərbaycan gəncliyi” mövzusunda keçirilən Tələbə Elmi Cəmiyyətinin XVII konfransının filial tələbələrinin yaradıcılıq potensialının artırılmasına xidmət baxımından böyük əhəmiyyət kəsb etməsindən danışdı. Direktor konfransı açıq elan etməzdən əvvəl Ulu Öndər Heydər Əliyevin və vətənimizin ərazi bütövlüyü uğrunda canından keçmiş şəhidlərimizin müqəddəs ruhlarını anmaq üçün bir dəqiqəlik sükut elan etdi. Sonra Azərbaycan Respublikasının Dövlət Himni səsləndirildi.
Dos. M. Məcidov çıxışına davam edərək, Heydər Əliyevin zəngin həyat yolu və müstəsna fəaliyyətinin bütün mərhələlərinin bir-birini tamamlamasından, öz xalqına sıx bağlılığı və milli dövlәtçilik məfkurəsinə sadiqliyindən danışdı. Heydər Əliyevin siyasi fəaliyyət xəttindən danışarkən onun gənclər siyasətindən danışan direktor qeyd etdi ki, Ümummilli Lider Heydər Əliyev ölkə rəhbəri olduğu ilk dövrlərdən gənclərin himayədarı olaraq sağlam düşüncəli yeni nəslin yetişdirilməsini dövlətin mühüm vəzifəsi hesab etmişdir.
Sonra söz məruzəçilərə verildi.
“Heydər Əliyev Azərbaycanın elm və təhsil sisteminin himayədarıdır” mövzusunda məruzə edən filialın tədris və elmi işlər üzrə direktor müavini dosent Seymur Süleymanov Ulu Öndərin siyasi hakimiyyət illərində Azərbaycan təhsili və elminə ayırdığı diqqət və qayğıdan danışdı.
“Heydər Əliyev və gənclər siyasəti” mövzusunda məruzə edən filialın Tələbə Elmi Cəmiyyətinin sədri Səbuhi Quliyev ötən əsrin 90-cı illərinin əvvəllərində dünyada, o cümlədən Azərbaycanda baş verən ictimai-siyasi hadisələr nəticəsində cəmiyyətdə gənclərin qarşılaşdığı problemlər və onların həlli istiqamətində uzaqgörən siyasətçi və dövlət başçısı Heydər Əliyevin misilsiz xidmətlərindən danışdı. Qeyd olundu ki, bünövrəsi Heydər Əliyev tərəfindən qoyulan dövlət gənclər siyasətinin Ölkə Prezidenti cənab İlham Əliyev tərəfindən uğurla davam etdirilməsinin nəticəsidir ki, bu gün Azərbaycan gəncləri bütün sahələrdə özlərini yüksək şəkildə doğruldurlar.
TEC-in sədri Səbuhi Quliyev cari tədris ilində filialın müvafiq kafedraları üzrə aparılan tələbə elmi-tədqiqat işlərinin mövzu aktuallığı və yüksək araşdırma səviyyəsi barədə də konfrans iştirakçılarını məlumatlanırdı.
Plenar iclasdan sonra konfrans öz işini bölmə iclaslarında davam etdirdi. “Riyaziyyat və fizika”, “Rəqəmsal bacarıqlar”, “Tarix”, “Coğrafiya”, “Ədəbiyyatşünaslıq”, “Dilçilik”, “Xarici dil” və “Pedaqogika - psixologiya” bölmələri üzrə aparılan elmi-tədqiqat işlərinin müdafiə prosesində layiqli namizədlər müəyyənləşdirildi.
Sonda konfransın qalibləri fəxri diplom və sertifikatlarla təltif edildilər.